Лола эстрадамизнинг ҳақиқий маликаси эди. Унинг ҳар бир таронаси, ижроси кўнгилларга илиқ туйғулар, поклик, қувонч улашгани ҳам айни ҳақиқат! Юракдан, ёниб-куйиб ижро этилган бу қўшиқлар ҳамон мухлислар кўнглида жаранглайди.
Унинг санъатдан кетиши нафақат мухлисларни, ҳамкасбларини ҳам қайғуга солганди… Санъат олами Лоласиз гўёки ҳувиллаб қолди… Лоланинг санъатга қайтиш эҳтимоли борлиги ҳақда эшитиб, жуда қувониб кетдик. Балки бу навбатдаги миш-мишдир... Аммо шамол бўлмаса дарахтнинг учи қимирламайди, ахир. Лоланинг қайтаётгани чинми ёки рост, аниқлик киритиш мақсадида Тарона-Рекордс директори Даврон Муқимовга сим қоқдик.
- Бу ҳақда олдиндан бирор нарса деб айтолмайман… Балки қайтар, балки… Лекин янгилик сифатида шуни айтишим мумкин, Лола янги қўшиқ устида ишлаяпти…
- Демак қайтади?!
- Қўшиқ тайёр бўлаверсин-чи, бу ҳақда кейинроқ маълумот берамиз…
Яна аниқлик кирита олмадик... Қизиқ, агар Лола санъатга қайтадиган бўлса, бунга унинг ҳамкасблари қандай муносабат билдиришади? Лола санъатга керакми ўзи? Саволларга жавоб олиш мақсадида унинг мухлислари ва ҳамкасбларига мурожаат этдик:
Нодира Бориева (Лоланинг биринчи рақамли ашаддий мухлисаси) сўзимизни охиригача эшитиб улгурмаёқ қувончдан қичқириб юбораёзди:
- Нима?! Лола қайтиши мумкинми?! Ура-а-а!!! Ҳурсандчилигимни сўз билан ифодалаш қийин… Мен бир неча йиллардан бери Лоланинг ашаддий мухлисиман. Унинг ҳар бир қўшиғини ёддан айтиб беришим ҳам мумкин. Уйимда унинг икки юздан ортиқ суратларини коллекция қилиб қўйганман. Ҳатто кўринишимни ҳам Лолага ўхшатиб юборишади. Менинг наздимда эстрада оламида унга етадиган хонанда йўқ! Лоланинг турмушга чиққач санъатдан кетганини ҳам оқлайман. Чунки аёл учун барибир оила биринчи ўринда! Лекин Аллоҳ берган ижодий қобилиятни, соҳир овозни ҳам ташлаб қўймаслик керак эди. Лоланинг қайтиши нафақат менинг қалбимни, балки санъат олами шодликларга, қувончга тўлдиради! Бунга ишончим комил! Қайт Лола, қайт!
Бобур Йўлдошев, ("Севинч” фильмида Лола билан биргаликда бош қаҳрамонларни ижро этишган)
- Лола қайтиши мумкинми? Қандай яхши бўларди… Лола санъатга жуда керак! Уни нафақат санъаткор, балки инсон сифатида ҳам жуда ҳурмат қиламан. Унинг санъатда ўз ўрни, ўз овози ва албатта минглаб мухлислари бор. Ундаги овоз, қобилият ҳозир ўзини юлдуз санаб юрган хонандаларимиздан анчагина устун ҳам эди. Ўйлайманки, Лола қайтса, санъатимиз бугунгидан ҳам гуллаб-яшнайди!
Раъно Ярашева ("Севинч фильмида Лоланинг онаси ролини ижро этган)
- Лолами?! У ҳақда жуда кўп яхши гапларни айтишим мумкин. Биласизми, ундаги ўта камтарлик, киришимлилик, каттага ҳурмат, кичикка иззат билан қараш хислатлари бугунги шоу-бизнесда жавлон ураётган "юлдуз”ларда камдан-кам ҳолларда учрайди. "Севинч”ни суратга олиш жараёнлари, Лола билан бирга ишлаганларимиз кечагидай кўз ўнгимда. Қизимдек яхши кўриб қолгандим уни. "Ҳурмат қилишларини истасанг ҳурмат кўрсат” ақидасига қаттиқ амал қилади Лола. Ўзбекча баъзи сўзларни талаффуз қилишга қийналиб, уялиб кетишлари, секингина келиб маслаҳат сўрашлари кўз ўнгимдан кетмайди. Лола чиндан ҳам қайтаётган бўлса, ўйлайманки, авалгидан ҳам каттароқ муваффақиятлар қозонади. Чунки у бунга ЛОЙИҚ!
Фарҳод Абдуллаев, ("Севинч”да Лоланинг отаси ролини ижро этган актёр):
- Лола фақатгина хонанда эмас, яхшигина актриса ҳамдир. Биласизми, авваллари хонандаларнинг фильмда рол ижро этишига бутунлай қарши эдим. Аммо "Севинч”да Лола билан бирга ишлагач, бу фикрим бутунлай ўзгариб кетди. У ўзига топширилган вазифани сидқидилдан, аъло даражада бажарарди. Лола қобилиятли қиз, бир қанча вақт ижодида бўлган узилиш уни янада кўпроқ изланишга, мухлисларни хушнуд этувчи қўшиқлар устида ишлашга ундашига ишончим комил! Лола, қайт! Сени барча мухлисларинг интизор бўлиб кутишмоқда!
Айюб Шаҳобиддинов ("Севинч” фильмининг режиссёри):
- Шундай бўлиши мумкинми?! Жуда яхши бўларди қайтса. Лолага ҳурматим катта. Ундаги қобилиятни ўша, фильмимга кастинг ўтказиб, Лолани танлаганимдаёқ сезганман. Лола Севинч образини тўла-тўкис очиб бера олди. Агар у бугун санъатга қайтса, аввалги мавқеини тиклай олишига ишонаман. Чунки мухлислари уни унутишмаган, ҳар он интиқ бўлиб кутишяпти. Мен унга фақат ва фақат олға юришни маслаҳат бераман. Омадингни берсин, Лола. Санъатга қайт, сени ҳамма кутяпти!
Акбар, хонанда:
- Лола менинг санъатдаги бахт туморим-ку! Мен илк марта унинг "Тошкент-Самарқанд” қўшиғи клипида чиққанман экранга. Агар турмуш ўртоғи унинг санъатга қайтишига изн берса жуда яхши бўларди. Чунки Лола санъатни ҳам, оиласини ҳам бирдай эплай олишига кўзим етади. Мухлислар Лоланинг янги қўшиқларини соғиниб кутишяпти, шунингдек мен ҳам! Лола санъатга керак, жуда керак...
Ха, Лола ҳақида бошқаларнинг илиқ фикрларини эшитиб, у санъатга керак эканлигини яна бир бор ҳис этдик. Балки Лола санъатга қайтишга бир оз иккиланиб тургандир, аммо бу сўзларни ўқигач, мухлисларининг, ҳамкасбларининг у ҳақдаги фикрлари ўзига бўлган ишонч ортишига кўмак берар эҳтимол… Нима бўлганида ҳам у санъатга жуда керак!
ҚАЙТ, ЛОЛА, ҚАЙТ!
__________________
